ସାମଗ୍ରୀ :
- ରୋହୀ ମାଛ – ୬ ରୁ ୮ ଖଣ୍ଡ
- କାଶ୍ମିରୀ ଲଙ୍କାଗୁଣ୍ଡ – ୧ ଚା’ ଚାମଚ
- ହଳଦୀ ଗୁଣ୍ଡ – ୧/୨ ଚା’ ଚାମଚ
- ଅଦା ରସୁଣ ପେଷ୍ଟ – ୧ ଟେବୁଲ ଚାମଚ
- ଲେମ୍ବୁ ରସ – ୨ ଚା’ ଚାମଚ
- ଲୁଣ – ୧ ଚା’ ଚାମଚ କିମ୍ବା ସ୍ୱାଦ ଅନୁସାରେ
- କଟା ପିଆଜ – ୧ଟି (ବଡ଼)
- ନଡ଼ିଆ – ୫୦ ଗ୍ରାମ
- ଭଜା ବାଦାମ – ୩୦ ଗ୍ରାମ
- ଲବଙ୍ଗ – ୩ ଟି
- ଗୁଳୁରାତି – ୧ ଟି
- ଡାଲଚିନି – ୨ ଟି ଛୋଟ ଖଣ୍ଡ
- ପିସ୍ତା ବାଦାମ – ୧୦ ଟି
- ଭଜା ଧନିଆ – ୨ ଚାମଚ
- ଭଜା ଜିରା – ୧ ଚାମଚ
- ଦହି – ୧୦୦ ଗ୍ରାମ
- କଟା ଧନିଆ ପତ୍ର – ୧ ଚାମଚ
- କଞ୍ଚା ଲଙ୍କା – ୪ ଟି
- ଗରମ ମସଲା – ୧/୨ ଚା’ ଚାମଚ
- ବିଲାତି – ୨ଟି
- କସୁରି ମେଥି ପତ୍ର – ୧ ଚାମଚ
ପ୍ରଣାଳୀ-
ଗୋଟିଏ ପାତ୍ରରେ ହଳଦୀ ୧/୨ ଚା’ ଚାମଚ, ଲାଲ ଲଙ୍କା ଗୁଣ୍ଡ ୧ ଚା’ ଚାମଚ, ଲୁଣ ୧ ଚା’ ଚାମଚ, ଅଦା ପେଷ୍ଟ ୧ ଟେବୁଲ ଚାମଚ ଓ ଲେମୁରସ ୧ ଚା’ ଚାମଚ ନେଇ ଭଲଭାବରେ ମିଶାନ୍ତୁ । ଏହାକୁ ମାଛ ଉପରେ ଭଲଭାବରେ ଲଗାଇ ଓ ଗୋଳାଇ ୧୦ ମିନିଟ ରଖନ୍ତୁ । ପ୍ୟାନ ଗରମ କରି ତେଲ ୧ ଚା’ ଚାମଚ ନେଇ ଗରମ କରନ୍ତୁ । ଏଥିରେ ମାଛକୁ ହାଲକା ଭାଜି କାଢି ଆଣନ୍ତୁ । ପରେ ଏକ ପ୍ୟାନରେ ଏକ ଚାମଚ ତେଲ ଗରମ କରି କଟା ପିଆଜ ପକାଇ, ଏହାକୁ ୧ ମିନିଟ ପାଇଁ ହାଲକା ଭାଜି କାଢି ଆଣନ୍ତୁ । ଭଜା ପିଆଜ, ନଡ଼ିଆ, ଭଜା ବାଦାମ, ପିସ୍ତା ବାଦାମ, ଡାଲଚିନି, ଗୁଜୁରାତି, ଲବଙ୍ଗ, ହାଲକା ଭଜା ଧନିଆ, ହାଲକା ଭଜା ଜିରା ଓ ଦହି କୁ ନେଇ ଗ୍ରାଇଣ୍ଡିଙ୍ଗ କରି ପେଷ୍ଟ ତିଆରି କରନ୍ତୁ । ଏହାପରେ ବିଲାତି କୁ କାଟି, ଏହାକୁ ଗ୍ରାଇଣ୍ଡିଙ୍ଗ କରି ପେଷ୍ଟ ପ୍ରସ୍ତୁତ କରି ନିଅନ୍ତୁ ।
ଏବେ ପ୍ୟାନ ରେ ତେଲ ଗରମ କରି ଅଦା ଓ ରସୁଣ ପେଷ୍ଟ କୁ କଶନ୍ତୁ । ଏହାପରେ ଏଥିରେ ବିଲାତି ପେଷ୍ଟ ପକାନ୍ତୁ । ବେଶୀ ଆଞ୍ଚରେ କଷି, ପରେ ସେଥିରେ କାଶ୍ମିରୀ ଲଙ୍କାଗୁଣ୍ଡ ଓ ହଳଦୀ ପକାଇ ଭଲଭାବେ କଶନ୍ତୁ । ଏହାପରେ ଦହି ମିଶ୍ରିତ ମସଲା ପେଷ୍ଟ କୁ ପକାଇ କଶନ୍ତୁ । ଏବେ ଏଥିରେ କସୁରି ମେଥି ପତ୍ର ୧ ଚାମଚ ପକାଇ ୨୦ ସେକେଣ୍ଡ କଶନ୍ତୁ । ପରେ ୧ କପ ପାଣି ଓ ସ୍ୱାଦ ଅନୁସାରେ ଲୁଣ ଦେଇ କଶନ୍ତୁ । ଭଲକରି କଷିଲା ପରେ ମାଛକୁ ସେଥିରେ ପକାଇ ଅଳ୍ପ ଆଞ୍ଚରେ ରାନ୍ଧନ୍ତୁ । ଧୀରେ ଧୀରେ ମାଛକୁ ଓଲଟାଇ ଦିଅନ୍ତୁ । ୨ ମିନିଟ ପରେ ଏଥିରେ ୧.୫ କପ ପାଣି ଦିଅନ୍ତୁ । ଏଥିରେ କଞ୍ଚା ଲଙ୍କା ,ଧନିଆ ପତ୍ର, ଲେମ୍ବୁ ରସ ଓ ଗରମ ମସଲା ପକାଇ ମିଶାନ୍ତୁ । ଏହାକୁ ଢାଙ୍କି ଅଳ୍ପ ଆଞ୍ଚରେ ୧୫ ମିନିଟ ପର୍ଯ୍ୟନ୍ତ ରାନ୍ଧନ୍ତୁ । ଝୋଳ ବହଳିଆ ହୋଇଆସିଲେ ଏହାକୁ ଓହ୍ଲାଇ ଆଣି ଗରମ ଗରମ ପରସନ୍ତୁ ।
